O le aso 14 o Aperila na tuua ai e le tamā o Tautaifau Kipaoa Faavesi 77 tausaga o le soifua lona aiga i Asau, ae oo mai i le taimi nei e lei toe foi atu lea tamā matua i lona aiga.

Ua sailia ai e leoleo i le atunuu ni faamatalaga e fesoasoani i le sailia o se nofoaga o iai lea tamā.

Ua faaalia e leoleo i se faasalalauga sa tuua e Tautaifau lo latou aiga i le taeao o le Aso Faraile 14 o Aperila i le faamoemoe e agai i le faatoaga e pei o lana masani, ae peitai e po lava lea aso e lei toe foi ane.

A o sailia ai pea lea tamā matua, ua faailoa foi e leoleo le manaomia o ni faamatalaga e saili ai se teineititi 16 tausaga le matua o le nuu o Falevao.

O le Aso Gafua o le vaiaso nei i le taeao o le taimi mulimuli lea na vaaia ai i lo latou afioaga, ae e iai lipoti ua oo i leoleo ua ta’ua ai sa vaaia le teineititi i luma o se faleoloa i le nuu o Laulii i le aoauli o le Aso Gafua lava lea.