O le faatuina e le Malo o le matagaluega e feagai ma le mataituina o le faagasologa o galuega a faalapotopotoga tuma’oti a le Malo, ua molimauina ai pea le tapuvae tasi uma i lea matagaluega fou o le faamaopoopoina o sao tau tupe poo le dividends a ia faalapotopotoga a le Malo.
O sao tau seleni poo dividend i le gagana peretania, o ni tupe ua vavae ese mai seleni mamā a se faalapotopotoga ma tuuina atu e faatupe ai galuega eseese a le Malo.
O le vaiaso na tea nei na molimauina ai le tauaaoina e le minisita o faalapotopotoga tuma’oti le Tofā Leatinuu Wayne Sooialo o le siaki tupe o le sao tau seleni o le Pulega o Uafu ma Taulaga le Samoa Ports Authority e toetoe lava 4 miliona poo se aofaiga e tusa ma le $3,991,448 tala Samoa.
O lea seleni tele e tusa ma le 35 pasene na vavae ese mai le aofaiga o polofiti poo tupe mamā a le pulega o uafu e tusa lona aofaiga ma le 11 miliona ($11,404,138).
O le faafitu a’i lea ona tuuina atu i le Malo dividends poo sao tau tupe o lea auaunaga tuma’oti a le Malo e pei ona faailoa i se pepa o faamatalaga.
Ua faailoa foi ua oo atu nei le aofaiga tuufaatasi o sao tau tupe o le pulega o uafu ma taulaga ua tuuina atu i le Malo mo ana galuega fai i le 23 miliona tala ($23,611,352).
Faaalia e le pulega o uafu le lagona faafetai ma le fiafia ona o le tulaga lelei pea o ana tupe maua ma ausia ai ni tupe faasili poo polofiti e pei ona faatino ai lona sao i galuega a le Malo, e pei ona aiaiga i le tulafono o le Public Bodies Act 2001.
O le afioga Sooalo Falelima Kuresa Sooalo o loo avea nei ma Ofisa Sili o pulega o uafu ma taulaga.
