A o tuufaatasia tala o le taeao na maua mai ai lipoti i le pisi o leoleo i le ogatotonu o le taulaga i Aukilani ona o se tasi o vesiga o loo tulai mai ai.

O lea sa faaaupegaina leoleo ma faatonuina foi tagata ia nonofo i totonu o latou fale.

O Quay Street lata i Britomart e tusa ma ripoti lea sa iai le toatele o leoleo ma i nisi o ata sa maua ai e iai le leoleo ua faamanu’alia ai ma o lea na ave e le ambulance.

I nisi o molimau faamoemoeina a tala fou i le taulaga, o le tea laititi o le itula e valu na faalogoina ai le pā pā o fana, ma e lei faatasi ona pā pā.

Na sau le valaau lapatasi mai le sui o le Auckland Council i tagata Aukilani ina ia taumamao mai le taulaga ma sa fai mea faalogo lava i leoleo.

O le fale tele a le Commercial Bay lea na aveesea mai ai nisi o tagata ma e foliga mai o le fogafale 13 poo le 14 lea sa tupu ai.

Lipoti Lata Mai – Vaega Tāua:

E toatolu tagata ua maliliu, e aofia ai ma le tagata na faapāpāina le fana le alii e 24 tausaga le matua, i le mavae ai o le osofaiga a lenei tagata i le nofoaga o loo faagasolo ai galuega o faugafale i le 1 Queen St i le taeao nei.

Na mafai e leoleo ona sue vaega na agai i ai lea tagata i fogafalealuga o se fale tele i Aukilani.

E toatele tagata ua lipotia mai o loo faamanu’alia, e aofia ai se tasi o alii leoleo.

O loo lapataia pea tagata i lea faaitu ina ia taumamao ese mai le nofoaga na tupu ai le faalavelave a o faagasolo pea suesuega a leoleo.

O le tulai mai o lenei faalavelavea ua faate’ia ai foi le matamata mai a le lalolagi a o feagai ai Aukilani ma ana taligamalo i le taamilosaga soka a tamaitai o le Ipu o le Lalolagi (Fifa Women’s World Cup) lea e amata aloaia i le asō.

O le a aumaia se faamatalaga mai le afioga i le Palemia, Chris Hipkins i sana feiloaiga ma le autusitala i se taimi o le taeao nei.