Ua aumai se fautuaga ma se lapata’iga malosi mai le Komesina o Sulufa’iga le afioga, Vui Clarence Nelson i le ‘au galulue i le tomai fa’atusitala ma ē o pulea ma avea ma faa’tonu o soo se auaunaga fa’asalalau i Samoa, ina ia fa’aaloalogia aiā tatau o fanau itu i le faafoeina o le latou galuega.

O le lapata’iga a le Komesina o Sulufa’iga e mafua mai i se tala ua fa’asalalau e le nusipepa o le Samoa Observer i lenei vaiaso ua faailoa ai suafa o ni fanau o se ali’i ma sona tuafafine ua maliliu ma o loo su’esu’eina le pogai.

Advertisement

O le faatalanoaina foi e le nusipepa o nisi o le aiga, fa’ailoa suafa, o le nu’u ma le matutua o tausaga o i la’ua ua fano soifua, o se atugaluga a le Komesina o Sulufa’iga ona o le silasila a lea ofisa o le malo ua le faatāuaina ai aiā tatau o fanau ua maliliu. O se tasi o itu ma’ale’ale ua fa’ailoa ai atugaluga, o le fa’ailoa i le lipoti o se su’esu’ega a leoleo o loo faagasolo e aunoa ma se faamaoniga o lea tulaga.

Ua solia ai taʻiala a le faʻalapotopotoga o le soifua mālōlōina o le lalolagi, o loʻo faʻailoa ai e lē tatau i se auaunaga fa’asalalau ona nonoa ma saisai faʻatasi se su’esu’ega i le mafuaʻaga o le maliu. O se faiga e pei ona fa’ailoa e lea ta’iala e faatupu ai ni māsalosaloga i lagona o tagata.

Ua momoli ai se fautuaga malosi a le Komesina o Sulufa’iga i faatonu ma ē o pulea le nusipepa faapea le ‘au fa’asalalau ma tusitala, ina ia toe iloilo a latou ta’iala ma faiga o loo faafoe ai le latou galuega, ina ia teuteu a latou ta’iala o loo faatino ai le latou auaunaga.

O le ta’iala o loo faafoe ai nei lea pitola’au o loo aiaia ai tulaga uma i le lipotia o mataupu e aafia ai fanauiti ma o loo aofia ai foi ma le faatāua o loo ave i aiā tatau a fanau i latou o loo mu’amu’a tauasaga o le olaga.