Ua lapatai mai le failautusi o Malo Aufaatasi Antonio Gutteres o le lalolagi o loo agai atu nei i se tulaga le lelei i le tau.

O lana faamatalaga sa faia i le fonotaga a le COP-27 pei ona faagasolo ai nei i Aikupito.

Ua valaau nei Gutteres i se isi maliega fou i le va o atunuu e itiiti tamaoaiga ma atunuu maumea ina ia galulue faatasi ai atoa ma fesoasoani tau tupe ma le aveesea o le eliina o koale i atunuu e lelei tamaoaiga pe a oo atu i le 2030. 

Na ia valaau i le malo tele o Amerika faapea foi ma Saina o isi ia atunuu tetele o loo iai sao i le faamatuu atu o kasa oona i le siosiomaga, valaau ina ia galulue faatasi aemaise lava i le mataupu i le tau.

E silia ma le 100 taitai o le lalolagi o le a faia ni a latou saunoaga i le fonotaga lava lea i le taumafai ai e fesoasoani i le faafitauli ua faatupulaia pea lea e faaigoa e saienitisi o le luitau aupito sili o loo feagai ma le lalolagi. 

E le gata la i le failautusi o Malo Aufaatasi ae ua lipotia e le SBS le valaau foi o lē sa avea ma sui peresetene o Amerika o Al Gore i taitai ina ia filifili le ola i lo le oti e ala i le faamutaina o le faaaoga o fossil fuels o loo atili ai suiga o le tau.

Fai mai a ia e le tatau foi ona faaaoga le taua i Ukraine e taofi mamau ai i le faaaogaina o fossil fuels.