A’o iai pea Samoa i tulaga o vavao ma tapunia ai le atunuu ona o puipuiga o le Koviti ua aafia ai tagata lautele ae e le’o nofonofo ai ma le au faatupu solitulafono o nisi lea ua matauina e Leoleo le toatele ua talepe fale o aiga ma pisinisi ma ave faagaioi meatotino a tagata.
O le lapataiga lea ua tuuina atu e le Matagaluega o Leoleo i le mamalu o le atunuu e tatau lea i tagata uma ona mataala e mata’itū lelei ia faiga e pei ona molimauina e le Matagaluega talu ona tapunia le atunuu i puipuiga o le faama’i.
O se faleoloa Supamaketi i Tuanaimato e Lata i le Ofisa o le Tineimū i le nofoaga o loo iai le malaetaalo na osofa’i e nisi ma ave oloa e pei o katuni sikaleti ma ava malosi faapea tupe.
O loo suesueina e Leoleo lea faiga solitulafono na faatino i le po o le Aso Sa ua mavae. O le sefe tupe o le faleoloa e faapea mai ripoti na sa’esa’e e i latou na osofaia le pisinisi i se taumafaiga e o ma latou ae sa lē mafai ona o le mamafa tele ona o se pusa tupe u’amea. Ua na’o tupe sa i le fata o le laulau a le pule o le supamaketi na mafai ona oo iai lima o le au talepe fale.
