Ua leai se faasalaga e faia e le Palemene i le sui faipule o Safata 1, le afioga Lea’ana Ronnie Posini, ina ua lagolago e le Palemene le lafo na faatū e le Palemia ina ia faamagalo le faipule ae aua ne’i faia iai se faasalaga, e pei ona sa fautuaina i le lipoti a le komiti su’esu’e faapalemene sa su’esu’eina ia tuua’iga.
O ia tuua’iga na saunoa ai Lea’ana i se tasi o fonotaga a le Palemene i le tausaga na te’a nei, e faapea o loo lafi le susuga Laauli Leuatea Polataivao Fosi Schmidt a o avea ma minisita o le Kapeneta, i tua o faasalalauga a le Tautai A’e i Niu Sila, o se pisinisi faasalalau e lē o lesitalaina i Samoa.
O le folasaga lava lea a le Sui Fofoga Fetalai le tofa Auapaau Mulipola Aloitafua o le ta’ita’ifono o le komiti su’esu’e a le palemene na su’esu’eina lafoga ale faipule o Safata 1, na ia faailoa ai ma fautuaga a le komiti ma le faasalaga e 3 aso e faamalolo pe tuueseina ai le afioga Lea’ana Ronnie Posini ma taualumaga a le fono aoao faitulafono.
I le talanoaina o le lipoti sa lilifa finagalo tetee i le lipoti mai faipule o le Itu Agai, ae lagolago nisi o sui faipule o le pati faaupufai o le Faatuatua i le Atua Samoa ua Tasi lea ua avea le susuga Laauli ma ta’ita’i o i le latou pati.
Sa saunoa le susuga Laauli Leuatea Polataivao Fosi Schmidt e tusa o le lipoti ma le faamamāina o ia mai tuua’iga, ma ia talia ai le finagalo o le ta’ita’i o le malo, ina ia faamagalo i le sui faipule na mafua ai le lafo na faatū i le Palemene ina ia su’esu’e le moni o ia tuua’iga.
Ni vaega o saunoaga i le Palemene a le sui faipule o Safata 1 le afioga Lea’ana Ronnie Posini ma le faipule o Gagaifomauga Numera 3 le ta’ita’i o le pati faaupufai o le Faatuatua i le Atua Samoa ua Tasi, susuga Laauli Leuatea Polataivao Fosi Schmidt.
