O le Palemia o Ie Malo o Italia, Peresetene o le atunuu o Indonesia, o le failautusi o le va i fafo o le malo tele o Amerika, ma le Palemia o Samoa le afioga Fiame Naomi Mata’afa, ua tutu faatasi e galulue ma opogi se tasi o fuafuaga tāua mo le faasagatau atu i suiga tetele o le tau, o le itu lea i le faia o taumafaiga uma tau i le atina’e mo le maua pea o taumafa mo atunuu, a o faia ai gaioiga mo le togafitia o aafiaga o le lalolagi mai suiga o le tau.
O le tasi lea o laasaga muamua ua faamautu i le fono a le lalolagi mo suiga o le tau o loo usuia i Dubai lea o loo auai le tamaitai Palemia o le tatou Malo ma lana usugafono e aofia ai le Minisita o le Matagaluega o Puna’oa Faalenatura ma Siosiomaga.
I se pepa faalauiloa o loo faalauaitele ai mataupu ma iugafono o lea faatasiga tele, ua faailoa ai e 130 atunuu ua latou lagolagolagoina le polokalame o taumafa ia aofia i polokalame o suiga o le tau, lea ua fuafuaina ai se vaegatupe e tusa ma le 2 tesimale 5 piliona tupe Amerika o le a faaalu ai.
I le fuafuaina o le faasoa atu o lea tupe tele o le a faapena ona aofia ai ni fesoasoani mo le lata i le 500 miliona faifaatoaga i le lalolagi ua latou lagolagina lea taumafaiga.
O le 130 atunuu ua latou opogi ma faamaopoopo lea fuafuaga tau taumafa o loo aofia ai i totonu le tusa ma le 5 tesimale 7 piliona tagata.
O le fono o suiga le tau le COP28 o loo auai le silia i le 70 afe o tagata o sui o usugafono mai atunuu o le lalolagi, lea o loo auai ma Pelesetene, ma Palemia o le 130 atunuu.
O le aso 12 o le masina nei o Tesema o le a mae’a ai le fonotaga.
