E silia ma le kuata miliona le tau o meafaigaluega na aumai mo le Koviti o lea ua uma aso e aogā ai, po ua expire foi ma o le a lafoai e le malo.
Na lipotia e le Stuff e faitau afe le tele o rapid antigen tests poo RATs, o masks poo ufi fofoga faapea ai ma ofu poo gowns ua vaavaai le matagaluega a le soifua maloloina o le a lafoai.
E 1,300 tone le mamafa, e tusa le tau ma le $286.8 miliona.
O mea faigaluega nei ma siaki na faatau mai i taimi o le Koviti, ma ona o le maaleale na iai i lea taimi o uta fela’ua’i i le va o atunuu o lea e iai nisi na faatuai mai, ae o isi na oka faasili ina ia lava tapena.
Mai le sooupu a le matagaluega, e lē na o Niu Sila na faia lea gaioiga, e faapea uma lava le toatele o atunuu.
Ua galulue nei le matagaluega e saili nisi i le maketi latou te lafoaiina nei oloa.
