Ua i’u lava ina faamavae lē sa faauluulu iai le Hawke’s Bay Civil Defence Group, Ian Macdonald e pei ona faailoa i lipoti a le RNZ i le asō.
O Macdonald sa ave ona livi i le vaitau tonu na aafia ai le atunuu i le afā o Gabrielle ma sa agai iai faitioga a nisi ona o le tuai o gaioiga e aveesea mai tagata ma faasaoina soifua.
E toatele sa valaau ai ua tatau ona faamavae ma o lea la ua faailoa i le asō o le aso 30 o Aokuso lona aso mulimuli i le galuega.
O se suesuega tutoatasi sa faatino e lē sa avea muamua ma Komesina o leoleo, Mike Bush na iloa ai e lei lelei le tali atu a le vaega o le puipuiga faalotoifale i le taimi o le afā o Gabrielle.
E toavalu tagata na maliliu mai i le faaitu lea o Hawke’s Bay ma e tele mea sa faaleagaina.
Ina ua fesiligia e le aufaasalalau Macdonald i lana faai’uga na fai e agai ese ai ae o loo feta’ua’ina le afā, na ia ta’ua ai sa mauaa lava lona manatu o le faai’uga sa’o lea na ia faia.
Puna o Faamatalaga: https://www.rnz.co.nz/news/national/523466/hawke-s-bay-s-civil-defence-group-controller-ian-macdonald-resigns
