Ua amata tuli nei le faasalaga faafalepuipui o se tamā e 67 tausaga le matua o lona soifua, ina ua faamaonia lona ioeina o le solitulafono o le avetaavale faatamala na mafua ai ona maliu se tamaitai 18 tausaga le matua o Tufuiopa.

O lē ua nofosala i le falepuipui o Punivalu Alafaio Fotu, sa auauna i le tofi faifeau o le Ekalesia Asofitu Samoa Tutoatasi i le taimi na tupu ai le solitulafono e mafua i se faalavelave tau taavale.

O faamaumauga a leoleo o loo faailoa ai, o le masina o Me o le  tausaga na tea nei na tupu ai le faalavelave ina ua oso i tua le pikiapu double cab o le ituaiga o le Mitsubishi na ave e lē ua molia.

O loo faailoa i lea lava faamaumauga a leoleo sa saoasaoa tele le taavale e pei ona molimau nisi o tamaitai sa malaga ai i le taavale.

O Aleisa na amata mai ai le faigamalaga ae ina ua oo ane i le pioga o le alatele i Tanumapua ao agai i Apia le taavale, na lē mafai e Punivalu ona faatonutonu le taavale ma tupu ai loa le faalavelave ina ua oso i tua ma faō le pikiapu ua u i luga ona pa’u.

O lē na maliu sa nofo i le nofoa i luma i tafatafa o le avetaavale.

O le ioe o lē ua molia i le solitulafono ua avea ma sona lelei i le fuaina o le faasalaga aemaise o le matua o lona soifua ae faatoa tulai lea i le faamasinoga i se solitulafono.

Na amata mai i le 4 tausaga le fua a le faamasinoga i le faasalaga ae ua toesea isi tausaga ma masina ona o itu lelei mo Punivalu, totoe ai le 2 tausaga ma masina e 3 ua faafalepuipui ai nei.

O le faasalaga maualuga o le moliaga o le avetaavale faatamala e maliu ai se tagata e sefulu tausaga i le falepuipui.