I se tala lata mai o le mataupu e faatatau i le fuafuaga a Iapani e faamatuu mai suavai faaniukilia ua mae’a ona faamamā agai atu i le vasa Pasefika, ua lipotia ai i le asō se finagalo o le taitaifono o le Pacific Islands Forum, Mark Brown e faapea o le fuafuaga lea e lē o solia ai le Rarotonga Treaty ona o le fuafuaga e lē o se lafoai o le suavai ae o se fuafuaga e faatonutonu lelei le faamatuu ese atu o le suavai.
O le Treaty poo le maliega lea o le Rarotonga Treaty e aofia ai le finau o le Pasefika ia aunoa ma ni faiga faaniukilia ma faasā ai le lafoai o otaota faaniukilia i le itulagi peitai la e manatu Brown e lē o solia le maliega lea i le faamoemoe o Iapani pe afai e usitaia lelei faiga tau le saogalemu ua mae’a faataatitia.
E 1.4 tane o le suavai lea ua mae’a ona siakiina e mai le Fukushima plant ua lē o toe faaaogāina ona sa faaleagaina i se taimi umi ua tuanai.
O Mark Brown o le Palemia foi lea o le Atu Kuki ma ua ia faamautu lona manatu i le mataupu lea aemaise o le iuga o suesuega sa faia e le UN Atomic Energy Agency (IAEA) ua ta’ua ai o loo faamalieina e Iapani tulaga faavaomalo mo le saogalemu i mataupu faapea.
