I se tasi o mataupu tau solitulafono e aafia ai le gaoia o tupe, ua amata tuli nei le faasalaga 18 masina poo le tausaga ma masina e ono o se isi tamaitai sa galue i le pisinisi tala tupe ma lafo ai seleni faamomoli o le Pacific Ezy.

O le tamaitai o Lele Matai’a sa galue i le lala o lea kamupani i Salelologa i Savaii ma aafia ai i le solitulafono o lona faaaogā o se vaega o seleni a le kamupani e aunoa ma se faatagana ma se ioega a le pulega.

Faaalia i lipoti sa tuuina atu e loia a leoleo i le faamasinoga aafiaga o le tautua a le kamupani ona o le gaioiga na tulai mai, lea e lē gata o loo molia ai Lele ae o se isi tagata sa la faigaluega faatasi o loo tetee i moliaga.

O lē ua faasalaina sa tetee foi ae ina ua valaau le mataupu ia Fepuari o le tausaga nei mo le valaauina o molimau a leoleo na suia ai le tetee a lē ua molia ma faasalaina i lona ioe i moliaga e fā a leoleo.

E 2 afe tala sa ia mafai ona toe totogi i le kamupani mai le aofaiga e 9 afe 839 tala na toesea i se auala solitulafono.