O le taofia o le tama’ita’i Initia o Pema Thongdok i le malae vaalele i Shanghai i Saina ua amata ane ai se feeseesea’iga i le va o Delhi ma Beijing.
Fai mai le BBC o Pema o se sitiseni o Initia sa aumau i Peretania ma sa taofia e sui o le Immigration a Saina ina ua malaga ane mai Lonetona aga’i i Iapani e ui ane i Shanghai, e māfua mai ona o loo lisi i lona tusifolau o ia sa soifua ane i le itu i Mātū i Sasa’e o le setete o Arunachal Pradesh i Initia, o se vaega o Initia o loo faapea mai Saina o lona teritori ma ua faaigoa o South Tibet, peita’i o loo teena e Initia lea tulaga.
O le vaiaso nei ua faailoa ai e Initia ua faia sa latou tetee faasaga i le taofia fua o Pema ma o Arunachal o se vaega o Initia.
Na faafesoota’i e lea tama’ita’i le ofisa o Initia ma amata ai loa feutana’iga ma o loo tālia se faamatalaga a Saina i le māfua’aga o le taofia o Pema lea na ia faailoa i le autusitala o se tulaga faamāina na aafia ai ona o le tula’i mai o lea tulaga.
O loo faatalia le isi laasaga i lenei matāupu.
Puna o Faamatalaga: https://www.bbc.com/news/articles/c8e9kz127w0o
