O le vaiaso nei ua fuafua e taunuu ai i Initia le faigāmalaga a le ta’ita’i o Lusia o Vladimir Putin lea ua lipotia o le a faatali mai i se sauniga faapitoa e faatino ai le faafeiloa’i masani a Initia mo ana malo faaaloalogia ma paaga.
Peita’i fai mai le CNN o loo taumafai le Palemia o Initia Narendra Modi e faatumau le mafutaga loloto ma Amerika, o lona uiga i le isi itu o loo naunau Initia ia faatau vaalele tau aupito lata mai nei a Lusia lona fausiaina aemaise ia iai se tau taugofie mo le faatauina o le suāuu ma ia faatumau pea le faigāuō, peita’i o le isi itu o loo fia faatumau foi le sootaga ma Amerika i tulaga tau tekonolosi, fefaataua’iga ma inivesi atoa ma le faamoemoe ia aveesea e Trump ana tariffs o loo tuuina pea i luga o Initia.
O le ulua’i malaga lea a Putin i Initia talu ona amata le taua i Ukraine ma o se taimi ma’ale’ale tele lenei mo Modi auā o loo feutaga’i foi ma Amerika i le taimi nei mo se maliega talafeagai tau fefaataua’iga.
O loo feagai foi ma le 50 pasene o lafoga faaopoopo poo tariffs mai ia Amerika ona o le latou faasalaga lea i le faaauau pea ona o latou faatau mai o le suāuu mai ia Lusia.
E foliga e fai foi o le naunau ia lelei ni maliega e faia ma Lusia i le malaga atu o Putin ae o le faafefefe foi ia Amerika ina ne’i ma’umau le la mafutaga ma le nofo lelei.
Atonu ua sao ai le isi ālagaupu a le atunuu, ne’i mana’o tele i le i’a ae ma’umau ai le upega.
Puna o Faamatalaga: https://edition.cnn.com/2025/12/03/india/india-modi-putin-delhi-visit-intl-hnk
