Ua amata iloilo ma su’esu’e i le Aso Lulu muamua o lenei masina fou o Tesema e le Faamasinog o Faigāpalota, le talosaga e ave i tua le tagi tau palota mai le itumalo faapalota o Falealili 1.
O se talosaga na tolopō lona su’esu’eina i le lua vaiaso ua mavae ina ua talia le talosaga a le vaega faaupufai e puipuia aiā tatau a tagata e fia auai i le iloiloina o le talosaga e ave i tua le tagi tau palota sa faaulu e le sui tauva o lea pati i le palota tele, le tofa Tuiloma Tusa Laneselota Lameko, faasaga i le sui faipule na toe filifilia o Falealili 1 i le faigāpalota ia Aokuso, le afioga Toelupe Mauiautele Poumulinuku Onesemo, o le tasi o Sui Palemia ma Minisita o le Kapeneta.
A o lumana’i le tagofia ai o lea matāupu i le ogatotonu o lenei vaiaso, o le Aso Lua i taualumaga a le Faamasinoga Maualuga na teena ai le talosaga a alii ma faipule o Falealili 2 e fia auai i taualumaga o iloiloga o le talosaga e ave i tua le tagi tau palota mai Falealili 1.
O le mau sa finauina i le talosaga a alii ma faipule, ua va le fogāvaa i le itumalo ona o le matāupu i le tagi tau palota ma ua alagātatau ai le ave i tua.
Peita’i e le’i mafai ona tuuina atu e le itu talosaga ni mau e faamaonia ai lea finauga ma teena ai i se faai’uga a le Faamasinoga Maualuga.
O taualumaga la o su’esu’ega o le talosaga e ave i tua le tagi tau palota, ua na o le itu na faauluina le tagi, itu na faasaga iai le tagi tau palota, itu a le vaega faaupufai e puipuia aiā tatau a tagata, ma le itu a le tofa Namulauulu Papalii Leota Sami Leota, o se Faipule o lea patī faaupufai sa poloa’iina e le faamasinoga e tula’i mo sana molimau.
Ua iai nei loia ua tauaveina le itu a le sui faipule.
Ua toe pau lea o le tagi tau palota o loo totoe o loo i luma o le faamasinoga.
