Ua faamaonia mai e le Minisita o Taaloga ma le Faafouina o le Malosi le Afioga Laumatiamanu Ringo Purcell, ua mae’a tofia se komiti e iloiloina faiga faavae mo faamanuiaga o alo ma fanau e maua pine mai taaloga faavaomalo. 

Na ta’ua e le alii minisita o le faiga faavae o loo taoto nei, se’i vagana alo ma fanau e maua pine i taaloga faavaomalo, peitai i lona manatu e tatau ona maua faamanuiaga e soo se tasi o le atunuu e maua pine mai taaloga.

Ua lata i le tolu masina talu ona mae’a mai taaloga o le Pasefika lea sa faia i Solomona, ma sa maualuga le taumafaiga a alo o le atunuu i taaloga eseese na faatinoina ai.

O le faaiuga na tulaga fā ai Samoa i le faasologa o atunuu o le Pasefika e tele ana pine.

O le ala lea o le fesiligia o le alii minisita mo ni faamanuiaga mo alo ma fanau a le atunuu, sa fai ma sui o Samoa i ia faagatama faavaomalo.

Na saunoa le alii minisita o faamanuiaga mo i latou na maua pine e nafa ma le Pulega o Taaloga ma Matematega a le atunuu, o loo tālia nei se aso e faamatuu mai ai e lea Pulega ia faamanuiaga mo alo o le atunuu.

O Samoa na ia maua le 35 pine auro, 21 pine siliva, 21 pine apamemea i ia taaloga.