Ua faatali nei alii ma faipule ma le afioaga o Levi Saleimoa pe talia pe teena e le faamasinoga lana talosaga e taofi le galuega a le afioaga o Afega o le suaina o tuaoi o ona eleele e pei ona iai le faaiuga a le faamasinoga o fanua ma suafa o le tausaga e 1963.
O le Aso Tofi o le vaiaso nei na folasia ai lea talosaga i luma o le faamasinoga o fanua ma suafa lea sa fofogaina i luma o le afioga i le Pelesetene o lea faamasinoga le afioga Lesatele Rapi Vaai.
O le aotelega o le talosaga a Levi Saleimoa, ua aafia o latou fanua ma meatotino i le galuega ma e tusa ma le 47 aiga ua aafia ai a latou meatotino ma eleele i le galuega.
O loo teena e alii ma faipule o Afega lea talosaga sa fofogaina e le tofa Maulolo Tavita o se matai o le nuu.
O le mau a alii ma faipule o Afega afai e talia e le faamasinoga le talosaga a Levi Saleimoa, o lona uiga ua aafia ai le faaiuga o le tausaga e 1963, lea ua taoto ai le tuaoi o eleele o lea afioaga ma Levi Saleimoa, e ese mai i fanua o Afega ua mae’a ona faamauina faaletulafono le nofoia e le afioaga o Leauvaa.
O le tasi o mataupu o loo taoto nei e lei iloiloina e le faamasinoga o fanua ma suafa, o le talosaga a Levi Saleimoa, o Alamutu ma Salepoua’e ina ia toe iloilo e le faamasinoga o talosaga apili a lea faamasinoga, le faaiuga na fofogaina ia Setema o le tausaga nei lea na faia ai le poloaiga e faatino loa le fuaina o tuaoi o fanua o le nuu o Afega e tusa ai ma le faaiuga a le faamasinoga o le tausaga e 1963.
O le talosaga a Levi Saleimoa ina ia faia se poloaiga e taofia ai le galuega o le tuaoi e faavae i lo latou talitonuga e tatau ona faatali muamua i se faaiuga o le latou talosaga apili o le a fofogaina i luma o le sui Pelesetene i se aso o le a faatulaga mai e le faamasinoga.
