Ua faatuputeleina lava le ita i totonu o Hong Kong, aemaise ua faasolosolo atu pea ina faaopoopo le aofai o nai tagata ua maumau soifua i le afi na sasao ane i se fale tele i le aso ananafi ma ua oo atu nei i le 94 ua maliiiu ai ma le toatele o loo manunu’a.
Fai mai le BBC o loo faailoa e leoleo e foliga o ni ‘ie e gaosi mai le uga (plastic) sa i luga o faamalama na afua ai ona sasao le afi, peitai o loo faaauau pea su’esu’ega.
O le itu o loo fia malamalama ai le toatele pe faapefea ona vave le sasao a le afi ae poo ai tonu e tuuaia. O loo iai tusitusiga ua agiga i luga o upega tafāilagi ua ta’ua ai e le o se faalavelave tupu faafuasei lenei mea ma ua faailoa foi e nisi e aumau ai i lea nofoaga e le’i faalogoina foi se leo o se sailini e faailo ai se afi i le taimi na mu ai le fale.
O nisi faamatalaga ua ta’ua ai e i latou e aumau i lea atufalega, o le afi sa tatau ona mafai ona taofiofia ma le oo i le tulaga ua iai nei, peitai e tele tagata e lei faatinoina lelei o latou tiute mo le saogalemu o tagata o loo aumau i lea vaega.
Ta’ua e nisi e masani ona vaaia le au kamuta o loo feagai ma galuega i lea fale tele o taumafa tapaa ma tuu mulisikaleti i luga o faamalama ma sa popole ai lava le toatele na vaai iai.
Puna o Faamatalaga: https://www.bbc.com/news/articles/cn8e5j20g27o
