E fa manu papàlagi poo povi o le faatoaga lafumanu a le Esetete Tausi i Mulifanua ua fasi ma aveesea i se auala faasolitulafono. 

O lea gaioiga ua i lima nei o Leoleo mo se suesuega ae ua faamālōlō ai nisi o le aufaigaluega a lea Faalapotopotoga a le Mālō. Ua faaalia e le Minisita o Faatoaga ma Faigafaiva faapea le nofoaga o suesuega faasaienisi ma le Esetete tausi e le’o le taimi muamua lenei ua aliali mai ai ni gaioiga ua aafia ai meatotino a le Faalapotopotoga. 

O lea la ua silasila le Mālō e faatino ni suiga i le pulea o nei meatotino a le atunuu ina ia mafai ona malu puipuia ma taofia ai le aafia pea i faiga faasolitulafono.

Taua e Laauli Leuatea Polataivao Schmidt “O’u te tulai atu mo le faigamalo fou, ua iai lava le tulaga lea o le faafitauli faaauau i totonu o le tatou Faalapotopotoga Esetete Tausi poo le S.T.E.C, o le mea lava lenei o le lima tagovale ma le osofaia pea o meatotino a le Mālō e nisi o tulaga e lē talafeagai ma o le faatulagana lea ua iai nei ua maea ona pasia e le Kapeneta faiga faavae fou ma se auivi fou, reform and restructure, ona o faafitauli nei. E manatu e le tatau ona tupu soo ma e le tatau ona toe faaauaua lea mea. O le tulaga e tatau ona iai o le a faatulaga loa le mataupu i le mea e tatau ona tuu iai ma o lea faatoa avatu nei le mataupu i totonu i leoleo e saili ma suesue”.

Taua foi e Laauli afai ae oo lava i le tulaga e aveese ai le aufaigaluega atoa a le Esetete Tausi faatasi ai ma le Pulega pe afai e tulai mai pea nei solitulafono ua ia sauni e faia lea tulaga.