O loo galulue faatasi le matāgaluega o le soifua mālōlōina a Niu Sila, ma ta’ita’i o ekalesia a le Pasefika i Aukilani ina ia una’ia le mamalu o le atunuu e fai tuipuipui, o siaki mo le kanesa ma isi vaega uma mo le puipuia lava o le soifua mālōlōina.
Na saunoa le faatonu sili o le Health New Zealand Pacific Public Health, susuga Api Poutasi, e tāua tele le faigāpaaga lea ma i latou o sootaga maufaatuatuaina i totonu o le komiuniti, ina ia faaleleia atili ai le tulaga o le soifua mālōlōina.
Saunoa Poutasi, ua fai paaga le Health NZ ma vaega maufaatuatuaina nei a le komiuniti, e aofia ai ekalesia Samoa, ina ia atili faaleleia tulaga tau le soifua mālōlōina o tagata Pasefika i totonu o le atunuu.
Saunoa Poutasi, o le lelei lea o le galulue soosootau’au ma ta’ita’i o ekalesia i totonu o le atunuu, e fesoasoani e faamautinoa ua faaoo atu le fe’au a le soifua mālōlōina i tagata aemaise lava ia momoli atu i se auala e masani ai tagata, e faaaloalo ma talafeagai mo tagata Pasefika.
O tagata Pasefika lea o loo ave iai le faamuamua mo le faia o tuipuipui e lē gata i nei faama’i pipisi ae faapea foi le faia o fā’ata mo nisi faama’i lē pipisi pei o le kanesa.
E oo mai i le aso 9 o le masina lenei o Mati, ua oo i le 73.8 pasene ua aofia i tamaiti Pasefika mai le 11 i le 59 masina le matutua, o loo nonofo i Aukilani ua mae’a ona fai o latou tuipuipui mo le misela, mami ma le rubella.
O le tuuaofa’iga atoa o le tuipuipui mo fanauiti ua mae’a ona faia mo tamaiti Pasefika mai le ono vaiaso le matutua se’ia oo atu i lalo ifo o le 6 tausaga le matutua, ua 67.2 pasene.
Ta’ua e le Health NZ, o nei faamaumauga e faavae mai le Aotearoa Immunisation Register ma atonu e lē o aofaiga sa’o a’ia’i lena o i latou ua uma ona faia tuipuipui ona e iai nisi lipoti o loo tuai ona tuuina atu i totonu, o le isi mea o i latou o loo fai o latou tuipuipui i nisi atunuu i fafo atu o Niu Sila atonu e le’i aumaia i totonu faamaumauga na.
Puna o Faamatalaga: https://pmn.co.nz/read/local-democracy-reporting/church-networks-in-auckland-mobilise-to-lift-pacific-health
