O le a fesoasoani le malo o Niu Sila i pulega a nuu faaitumalo e ala i le toe faatau ese mai o fale o aiga mai nisi o nofoaga e le o mafai ona toe fausia ai.
O ananafi o lea ua faailoa e le Council i Hawke’s Bay le faafanua o pitonuu nei e lamatia gofie pe a toe afatia pe lolovaia i le lumanai.
E le o vaega uma o Hawke’s Bay lea na faaleagaina o loo agavaa i lalo o le puipui 3 lea ua faatulaga ai nofoaga ua matuai maualuga le lamatia.
O se taumafaiga na faafetaia e le minisita o loo gafa ma galuega toe faalelei o le afā Grant Robertson ma na ia faailoa ai o lea o le a faia e le malo feutanaiga ma Councils e mafai ai ona faatau ese mai fale nei, ese ai le faatupeina o poloketi e toe fau ai ia malolosi atili ogapaipa mo puipuiga i nisi o nuu.
E le o ma’oti pe faafefea ona faatupe, pau o lea o loo faasolo pea iloiloga ma o loo faatali atonu o vaiaso o i luma.
Ae i Aukilani lea foi o loo faatali pea le toatele o aiga aemaise lava i le itu i Sisifo, o le aso 12 o Iuni lea ua faailoa mai e fono ai aiga ma le Auckland Council.
