Ua lipotia i le BBC i le vaiaso nei le tulaga ua iai nei Saina ma le aga’i i luma o ana taumafaiga i le faaaogāina o le silafia faaonaponei aemaise i le polokalame o le AI ma le faaaogāina o masini poo robots e faatinoina galuega i totonu o fale faigaluega.

O le lipoti a le BBC na o latou asia ai nofoaga o fale gaosi oloa ua faafaigaluega ai masini ia poo robots e faia le galuega e aunoa ma ni mālōlōga ae lē gata i lea, sa o latou āsia foi nisi o nofoaga mo a’oa’oga i Saina ua a’oa’oina faapitoa ai tagata e galulue i autafa o masini ia mo le faafaigofie atili o galuega.

Advertisement

Ua faailoa i le lipoti e iai kamupani i Saina o loo galulue i le fausia o robots ia e latou te gaosia taavale aemaise masini e alu i le eletise.

Fai mai o le faaitiitia o le faitau aofa’i o Saina aemaise le faasolo ina matutua o isi, o le isi lea māfua’aga ua faavave ai gaioiga a Beijing e faia suiga ia i ana fale gaosi oloa.

O le tasi talitonuga o loo faalagolago tele iai gaioiga a Saina o le talitonuga lea o masini e mafai ona galulue i le 24 itula i le aso e faatusa i le tagata faigaluega.

Fai mai nisi o finagalo e moni o Saina e lelei tele i le fausia o le tino peitai o Amerika lava o loo taulamua i le fausiaina o le mafaufau e aofia ai ma le AI lea ua faaaogā nei e faapolokalame ai robots poo masini o loo faaaogāina.

Ua ta’ua foi i le lipoti e iai kamupani a Saina ua o latou faailoa isi ituaiga models o le AI e faatautavā ai i kamupani tetele a Amerika.

Puna o Faamatalaga: https://www.bbc.com/news/articles/c62m4zn1q6mo