Ua taoto nei se fuafuaga a le Mālō i se faaiuga a le Kapeneta ua pasia ai le fausia o se auala e oso mai Vaitoloa seia pāia Fugalei seia oo i se tasi o faletele a le Mālō o le Tuiatua Tupua Tamasese Efi o loo i Sogi.
O lenei fuafuaga na mafua ona o le faatupulaia pea o taavale afi i le tatou atunuu ma faapena ona feoma’i ai taavale i taimi pisi o feoaiga i le taeao faapea le afiafi o aso faigaluega mai le afioaga o Lepea e agai mai lea i totonu o le taulaga o Apia.
O le faatalanoaga ma le Minisita o Felauaiga ma Galuega Tetele a le Mālō ia Olo Fiti Vaai na ia faailoa ai lea fuafuaga ma ia taua foi tapenaga ua faagasolo mo le fausia o lea auala tele fou ma le naunautaiga o le a mafai ona maua ai se fofō e faaititia ai le tuai o faigamalaga a le mamalu o le atunuu e agai atu i le taulaga mo galuega ma aoga a le fanau faapea isi fuafuaga masani.
Taua e Olo “O lea ua ioe le Kapeneta i le tulaga lena o le auala e agai mai i Vaitoloa agai mai i tua o le fale o TATTE, o le tulaga la lena a silasila foi i le taeao ma le afiafi toeitiiti atoa le
itula o e tolotolo mai na i Vailoa e tau mai i Vaimoso i le tele o le taavale ua iai nei. Sa ave a la ni nai mafaufauga foi lea i le tatou Kapeneta o se faatagana foi lea e fai ai le auala lena. O mafaufauga lena o loo iai nei ma o loo galue foi la le afioga i le tamaitai Minisita o Tupe i le sailiga o se grant mai atunuu e fai ai le faamoemoe lea.”
O le taoto ai la o le fuafuaga mo lea galuega ua faailoa foi e le Minisita le taoto o se isi tapenaga i le fausia o se auala tele taamilo e ui mai tua o le nofoaga o loo iai le maota Faamasino i Mulinuu, ui ane ai i tua o le maota palemene ma agai atu ai i se vaega i Sogi i se taumafaiga ia iai se auala e vavae ai faiga malaga a taavale e agai i Mulinuu ona taamilo ane lea ma toe taunuu i le taulaga.
Taua foi e le afioaga i le Minisita o le aoga foi o lenei auala o tulaga i faalavelave faalenatura poo faalavelave faafuasei ma o lenei auala e fesoasoani ai i le mamalu o le atunuu e uia ma agai atu i nofoaga saogalemu. Ua iai foi le naunau o le Mālō o Iapani latou te faatino ina lea galuega.
