Tuilaepa Lupesoliai Sailele Malielegaoi

Fuafuaga a le Malo tausi i le tala faatatau autu o le tupe

E maea i le Aso Lulu o lenei vaiaso le masina o Iuni ma ua faamuta ai foi ma le tala fa’atatau autu o le tupe mo galuega ma auaunaga masani a le malo ona e le’i pasia se tala faatatau autu fou o le tupe e tatau ona amata faaoga i le Aso 1 o Iulai 2021. Peitai o le a le taofia galuega ma auaunaga masani a le Malo o le a fa’aauau pea seia oo i se taimi e tauaofia ai le Palemene fou e pasia le tala autu fou o tupe faaalu.

O le saunoaga faaluaitele o le Palemia tausi lē tumau susuga Tuilaepa Lupesoliai Sailele Malielegaoi ua ia fa’amautu ai le fa’aauauina pea o galuega ae o tupe o le a faaalu o le a pasia  i le ioega a le afioga i le Ao o le Malo e pei ona aiaia ai i le faavae.

Ua manino mai foi i le finagalo o Tuilaepa e lē tauaofia le Palemene i totonu o aso e 7 e pei ona faatonuina ai e le poloaiga o le faamasinoga  lea na folasia i le Aso Gafua ina ua lau le faaiuga a le talosaga a le loia Sili lea ua soloia ai le faatautoga o faipule filifilia e to’a 26 a le FAST ona e soli faavae.

Taua e Tuilaepa “I le leai la o se tala autu o le tupe mo le tausaga fou faaletupe a le malo i le piliota 2021-2022, o lea ua faapea ai foi ona faagasolo ma faaauau auaunaga uma a le tatou malo ina ia taofia ai le mafatiaga ogaoga tutupu e aafia uma ai le atunuu atoa i aiga uma lava, faapea atinae ma pisinisi eseese o loo faalagolago mai i auaunaga masani a le tatou malo ae faaaoga ai a tatou poloaiga o le SOE o loo iai nei.

O le a faaauau seia oo lava ina pasia e se palemene ua tauaofia se tala autu fou o le tupe mo le 2021 – 2022. O le a faapena foi ona faalaolao taimi galue o le aufaigaluega atoa a le ofisa o le su’e tusi sili  a le malo e siaki auiliili faamatalaga uma tau tupe, tupe faaalu mo le tauaaoina ma le faatagana faapitoa e le Ao Mamalu o le malo e tusa ai ma aiaiga o le tulafono mo le puipuiga malu o tupe faaalu a le malo i taimi ia o poloaiga mo faalavelave  faafuasei ma mala matuiā.

O le Ao mamalu o le tatou malo o loo iai foi le pule tutasi mo le faatagaina   o le faaaluina o tupe a le malo i lalo o teugatupe a le tatou malo e tusa ai ma le fuaiupu  93 o le faavae o le malo o Samoa. O le faaoloolo maau ia lava pea le onosai, lava le toafilemu ma le faapalepale ao alofaiva le tatou malo e tau fofo le mau luitau ua feagai ma le tatou atunuu”.

O le poloaiga a le faamasinoga i le tatau lea ona tuaofia le Palemene i totonu o aso e 7 lea e ma’ea i le Aso Gafua o le vaiaso fou ua iai ma aulape malolosi i le molia oi latou uma e aafia i le faia o tapenaga i le tauaofiaga o le palemene pe a tetee ma lē usitaia lea poloaiga.

Ae o le feiloaiga i le Aso Gafua a tusitala ma le taitai o le FAST Fiame Naomi Mataafa na fesiligia ai i le tala autu o le tupe ma tapenaga a lana vaega faaupufai ua iai le numera folasia o nofoa e 51 o le palemene. O le finagalo o le sa’o faapito o lea ua iai tapenaga masani a le Matagaluega o tupe a le Malo e tusa o aiaiga o tulafono ae o le 7 aso ua poloaiga e le faamasinoga e tatau ona usu iai le fono a le palemene e faatauto uma iai sui filifilia ma faataatia ai le tala o le tupe e tatau lava ona usitaia e le malo.

Taua e Fiame “e na’o le faasalalau mai o tulaga lautele ma lea lava e aumai faasalalauga a le ofisa o le tupe ua iai le latou tapenaga ae lea foi la e faailoa mai e le mafia ona gaioi se mea vagana ua ua fono le fono faitulafono ma pasia se tala o le tupe. O lea la e tālia lena tulaga a’o lea foi e feagai tatou ma se tulaga foi lea e omia ai fuafuaga ona o lea o le a uma le tala o le tupe.

O mea uma lava nei, foi lea i le malo faaauau poo le a se lagona ma le manatu na iai o lea ua agai atu i se tulaga foi lea o le a ono faalavelavea ai le faaauau o galuega a le malo pe a faapea e tuai le tapenaga ao le mea lea e fuafua ai mo le 7 aso. E le’i tupu muamua ia tatou, ia pe na iai se taimi i le 1988 i fesuiaiga o faigamalo na na iai ni fetuunaiga na fai i luga lava o le tualfono foi lea o tupe faaalu a le malo.

O mea lava e tutupu, e iai foi auala e taltionu e mafai ona foia ai foi lena lu’i  a’o le faamoemoe a ia o le a faaaoga lelei le 7 aso lea ua tuu avanoa mai ai le faamaisnoga e mafai ona gaioioi ai  le Pulega ma fai tapenaga foi lea mo le tauaofiaga  o le Palemene”.

O le faaauauina o galuega masani a le malo e aunoa ma se tala autu o le tupe ua iloilolina ma pasia e le Palemene ua faaauala mai lalo o aiaiga o poloaiga o taimi o faalavelave faafuasei e pei ona faamamalu e le atunuu atoa ona o puipuiga o le faamai o le koviti19.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required