Fuafua Samoa ia maea uma tui puipui i totonu o le 3 masina

Ua maea le isi vaiaso o le faagasologa o tui puipui mo le mamalu lautele o le atunuu ma ua faamauina mai le 40.6% oi latou ua maea le tui muamua ae ua 4.2% i latou ua maea atoatoa tui e lua o le Koviti19.

O le tepataulai a le Matagaluega o le Soifua Maloloina o le aofai o tagata Samoa lea e totoe e tatau ona fai tui puipui uma e lua e oo atu i le to’a 117,000 ma o le a vaavaai ina ia faataunuu lea vaega i totonu o le 3 masina.

Taua e Leituala Dr. Ben Matalavai ua telē le aafiaga o atunuu tuaoi o Samoa e pei o Fiti lea ua maualuga lava le agai o numera o tagata ua aafia ma e lē tatau ona oo Samoa i lea tulaga. “E na’o le 200,000 le aofia o tagata Samoa ma o le numera lea e tagatagai ai e lata i le to’a 120,000 e le tatau la ona oo Samoa i le tulaga ua iai Fiti”.

Taua foi e Leituala e tatau pea ona faatumauina le saogalemu o Samoa mai le faama’i (covid free).

O loo faagasolo pea le faatinoga o tui puipui a le atunuu i tua i nuu ae le gata i lea o nofoaga faitele o loo faatautaia ai tūiga mo tagata lautele.