Ua iai se fuafuaga a le Minisita o le Matagaluega o Leoleo, Falepuipui ma le Ola Toefuataina e toe ave i le Pulega o Feoaigai luga o le Laueleele poo le Land Transport Authority (LTA) le faia o laisene avetaavale ma le laiseneina o taavale afi e pei ona sa iai muamua.
Ua faaalia e le Minisita afioga Faualo Harry Schuster o loo tālia nei se fautuaga a le Matagaluega o Tupe a le Malo i se tau e faatino ai lea tulaga ao le’i faatinoina. Ua ia faaalia foi o se suiga e mafai ona faatino i totonu o le 6 masina.
O le iai o lea fuafuaga o le toe faafoi le galuega o le laiseneina o taavale ma le faia o laisene o Pulega o felauaiga i luga o le laueleele o le a faatino ai e leoleo le galuega o le faamalosia o tulafono tau taavale afi ona e leai ni leoleo e faapitoa lava le latou galuega ma tiute tauave i le vaaia na’o le tulafono ma mataupu tau taavale afi.
O lona uiga o le itu tau seleni o le a nafa ma le Pulega o feoaiga i luga o le laueleele ae o tulafono e faamalosia ai o le pitolaau lea a malu o le Mālō.
