Fai mai Anthony Albanese, Palemia o Ausetalia o le a ia faatalannoa ma le faaaloalo ma le ta’ita’i o le Atu Solomona, fuafuaga a Saina e faatatau i se nofoaga faamiliteli i lea atunuu. 

Na fesiligia e le autusitala le alii Palemia lea o loo iai nei i le fonotaga a le Pasefika i Fiti i nisi o mataupu e aofia ai le finagalo faaalia o Amerika e pei ona folasia i le asō i le fesoasoani ane ai i le Pasefika. Tali Albanese o Amerika o se vaega tāua o paaga a le itulagi ma e taliaina lelei e Ausetalia le toe faamautuina ane o le latou lagolago i le mataupu lea.  

Ta’ua foi o le a feiloa’i atu le alii Palemia i le Palemia o Samoa a o iai i le fonotaga ma faailoa foi e Albanese o le a talanoaina foi le tulaga tau tupe e tali atu ai i suiga o le tau aemaise o fuafuaga e agai mai ai tagata i Ausetalia ma maua ai ni galuega. 

Fai mai le Palemia o le lagolago a Ausetalia i le itulagi lea e aunoa ma ni lavelave o aofia ai, lona uiga fai mai Albanese, e lē o togia e Ausetalia le moa ae uu le ‘afa e pei o lea foi upu a le atunuu.