E taua i le Minisita o le Soifua Maloloina le afioga Valasi Luapitofanua Toogamaga Tafito Selesele le faia o suesuega i le faama’i o le misela na fano ai ola ma soifua o le silia i le 80 o tagata e toatele lana i fanau laititi lona finagalo e le’o se saili masei ae Ia faia le suesuega e taofia ai le toe tulai mai o se tulaga na aliali mai i le pipisi o lea faama’i ma aafia ai le atunuu.
Na maua se avanoa e fesiligia ai le alii Minisita i lea mataupu e pei ona sa vāvāō ai finagalo o sui mamalu o le paeaiga ua tuanai atu a le Palemene lea na faailoa ai e le taitai o le faigamalo ua see ese ma le Pulega o le atunuu e lē faia se suesuega ae tuuaia le faatamala o matua i le lē ave o a latou fanau e fai o latou tui puipui o le misela.
Taua e Valasi “E le’o se naunau e sailiili poo ai e tuuaia a’o le a lava ni faaletonu, ua tatou talitonu i faaletonu sa iai ma tulaga e pei ona iai le na foi vaitau ae o le agaga lava ia telē se aoaoga mo Samoa i le agai i luma ia aua nei toe tupu”.
Na ia taua foi “O le agaga la e manino lava le tilotilo toto’a i le tulaga o le faatinoga ma le mea e tatau ona fai”.
O le tausaga e 2019 na matuai aafia ai Samoa i le pepesi o le faama’i o le misela lea na fano ai ola o le toatele o fanau laiti ma tagatagai ai foi i vaega mo le puipuia o le atunuu atoa e ala i le lē mafai ona ulufale atu i Samoa i lea tausaga pe a fai e le’i fai lou tui misela.
