O le vaiaso nei e to’atolu ni ta’ita’i o sui o nisi o malo i fafo o loo vavalalata a latou faigāpaaga ma le malo o Samoa o le a afea e o latou sui le atunuu faapea le masina fou o Mati.
O le faai’uga o lenei vaiaso e afea ai Samoa e le sui failautusi o le va i fafo o le malo tele o Amerika, le Deputy Secretary of State, le susuga Christopher Landau.
O ia o se tasi o sui maualuga o le pulegamalo a Pelesetene Donald Trump o le a afea Samoa talu ona toe tula’i mai lea ta’ita’i o le malo o Amerika.
Ua faailoa e le ofisa o lea malo i Apia le afea o Samoa i le faai’uga o le vaiaso e le sui failautusi o le va i fafo o Amerika ma o se asiasiga o le a feiloa’i atu ai le ta’ita’i o lea malo i ta’ita’i o le malo o Samoa.
O se tasi o taligāmalo a Samoa i lenei vaiaso o le afioga i le tama’ita’i Minisita o le Va i Vafo o le malo o Ausetalia o Penny Wong lea e taunuu i le Aso Lua o le vaiaso nei.
Ua faataoto ai i le polokalame o lea asiasiga le feiloa’iga ma le Palemia o le tatou malo, lea o le a faatino ai nisi o talanoaga i ni matāupu tāua i le atina’e o le malo o Samoa aemaise o le galulue faatasi o malo e lua.
Ua fuafua e malaga i Savaii le tama’ita’i minisita o le va i fafo o Ausetalia e tatala se tasi o galuega sa fesoasoani mai ai lea malo, o le nofoaga mo galuega a leoleo i Salafai le Tuasivi Maritime Wing Outpost.
O le a asia foi e Penny Wong le tulaga ua taoto mai ai le galuega o le fausia o le ofisa fou o le Fono Aoao Faitulafono i Mulinuu o loo faatupe foi e lea malo.
O le Aso Gafua o lenei vaiaso na afea ai Samoa e le Pelesetene o le polokalame fesoasoani a le malo o Iapani e ta’ua o le JICA, lea o loo aumai ai nisi e iai agavaa ma tomai e fesoasoani i galuega o le atina’e o le tatou malo.
O se polokalame a le malo o Iapani o loo faasafua atu foi i isi atunuu o le Pasefika e pei ona sa afea e le pelesetene o le JICA le malo o Tonga a o le’i malaga mai i Samoa.
O le masina fou o Mati o le a talimalo ai Samoa i le malaga faalemalo a le Palemia o Niu Sila ma tatala ai ma le maketi fou i Savalalo o se galuega o loo tele se sao tau tupe o Niu Sila i lona faatupeina.
