O le masina o Me o le tausaga e 2021 na filifilia ai le Pelesetene ma le laulau o le Komiti Faafoe o le faalapotopotoga o tusitala ma le aufaasalalau a Samoa, ae o lana fono faaletausaga muamua i le silia ai nei i le tolu tausaga talu ona faia lea filifiliga, o le a faataunuu i le aso 6 o le masina fou o Tesema.
O le faalapotopopotoga lenei ua faavaeina faaletulafono poo se statutory organisation e lipoti atu i le Palemene i tausaga ta’itasi e pei ona aiaia faaletulafono.
Na faaalia e le faalapotopotoga o le tuai maua o lana tala poo le lipoti i faamaumauga o le faaaogāina o ana tupe o le mafuaaga lea o le tuai ma tolotolo umi le faia o lana fono faaletausaga.
O le fono na taloina e le Pelesetene ma le Komiti Faafoe i le Aso Tofi ua mavae e talanoaina ai tulaga sa faatino ai le galuega a tusitala ma le aufaasalalau a o tauaofia i Samoa le Fono a Malo o le Taupulega ia Oketopa, na laga ai e le mataupu i le fono faaletausaga ma faailoa ai e le Pelesetene o le masina fou e usuia ai.
O le fono lea o le a folasia ai le lipoti o le tupe ma filifilia ai se laulau fou.
