O le fono faavaomalo i le atunuu o Thailand i le vaiaso nei o lo’o lotolotoi ai ma le usugafono a Samoa ma lana mau tau molimoli o le “Pola Puipui”, o se taumafaiga na fa’ama’ite e avea ma autū o taumafaiga e taofia ai sauaga i lo tatou atunu’u.

O le fono faavaomalo o loo usuia i lea atunu’u na amata i le Aso Gafua ae faamae’aina i le Aso Faraile o lenei vaiaso; o loo talanoaina ai taumafaiga e tete’e ma taofia ai sauaga tau feusua’iga poo sexual violence.

O loo ta’ita’ia ai le usugafono a Samoa e se tasi o Ofisa Sili Lagolago e le’i leva ona tofia o le Matagaluega o Aiga ma Agafesoota’i le tama’ita’i o Ana Le’au o loo faauluulu iai le vaega o lea Matagaluega fou a le malo e fitoitonu i mataupu tau agafesoota’i mo le itupā o ali’i ma tama’ita’i, ma o le Aso Lulu lenei o loo faia ai lana folasaga i lea fa’atasiga tele o loo autū i le fa’avaa o auaunaga ua fausia e le Matagaluega e autū i le pola puipui lea ua galulue ai pulega a ali’i ma faipule ma fono fa’avae a itumalo e faatino le galuega o le tete’e atu i ia itu’aiga o sauaga, o loo sili ona a’afia ai tama’ita’i ma fanau teine lāiti.

Ua fa’aalia ai e le Ofisa Sili o le Matagaluega, le afioga Loau Donina Tili Va’a i se pepa fa’alauiloa e lē gata o le tāua o le auai o Samoa i le fa’asoa i le atunu’u o Thailand ia maua ai o meatotia ma auala e fesoasoani i le taofia o sauaga tau feusu’aiga i Samoa, ae o le momoli atu foi o le sao mai auala ma faiga o loo faatino i lo tatou atunu’u e togafiti ai sauaga e fai ma fesoasoani mo isi atunu’u.