Na folafola foi i le aso ananafi e le pati poo le vaega faaupufai a le Green lana fuafuaga e toe faafoi ai fanua ua aveesea sese mai tagata Maoli.

O se vaega lea o le fuafuaga a le Green e pei ona faailoa i le lipoti o le a suia ai le Public Works Act ia taofia ai le toe avea o fanua Maoli i le lumanai.

O loo mananao foi le Green e faatū se komisi suesue e suesue ai fanua ia na aveesea e ala i le solia o le Treaty.

O le isi taitai o le vaega faaupufai, Maram Davidson na ia faailoa i le leitio faavaomalo a Niu Sila o le toe faafoi o fanua o Maoli o le mea sa’o lea e ao ona fai.

A o tulalata ai Aotearoa i le faamanatuina o le 185 tausaga o le sainiga o le Te Tiriti o Waitangi ma le 50 tausaga o le sainia o le Tulafono le Treaty of Waitangi Act fai mai le Green o le taimi lenei e vaavaai ai i laasaga e faamautu ai le polomisi sa faia i le Te Tiriti ma faasa’o mea sese sa fai. 

Fai mai a latou o le a faailoa e le Pati a le Green le ituaiga taitaiga faapolokiki e manaomia ina ia amanaia ai ia vaega tāua.