O se taimi o le masina lenei o Mati o loo fuafua e taunuu ai I Samoa le uta o uila e 110 ua foaia e le faalapotopotoga o le Soroptimist International e fesoasoani ai i teineiti Samoa ile agai ai I aoga ma fesoasoani ai I le faaleleia o le soifuaga mo e o le a maua ia faamanuiaga.

Lipotia e le ABC ua faailoa ai o le Soroptimist group lea e faamautu I Griffith I Niu Sau Uelese nei ma o se vaega lea o le faamanatuina o le 100 tausaga ole faalapotopotoga e auga tonu la latou fesoasoani I le itupa o tamaitai .

Faailoa I lea lipoti se saunoaga mai le sui o le faalapotopotoga lea I lona ofisa I Samoa, Leniu Asaua Faasino o le peresetene foi o lea o le faalapotopotoga I Samoa, na ia taua o nisi o nei uila ole a foaiina atu I teineiti o loo I nofoaga maotua ia maua ai se fesoasoani I le agai ane I nofoaga e faatali ai pasi, poo le aoga foi poo le agai I le faleoloa.

Ua faamoemoe o le a iai foi nisi fuafuaga faaopoopo e faia I uila nei ise tulaga faapaaga ma nisi o faletalimalo I Samoa aua le maua ai o nisi fesoasoani tau tupe e ono mafai ona faamama avega ai I pili aoga mo nai fanau teine.