Ua tuuina mai i le malo o Samoa e le Falapotopotoga ua ta’ua o le International Organization for Migration i le Aso Tofi na mavae nei masini mo le faaleleia ma le siitia o le auaunaga mo tuaoi o le atunuu lea o loo faatino e le Samoa Immigration i lalo o le matagaluega a le Palemia ma le Kapeneta.
E $124,000 tala Samoa tusa ma le 46,000 tala Amerika le tau aofai o masini e tolu e faia ai faamaumauga (data base servers) o ia masini e televavave toe tele le avanoa e faamauina ai faamatalaga.
E lē gata i lea o masini fesoasoani e lua latou te faamauina faamatalaga mai masini autu, ina ia maua pea e tusa pe iai se faaletonu i masini autu (UPS Backup Servers).
O lea fesoasoani na faatupe e le malo o Iapani, ua faaalia le agaga fiafia o le malo o Iapani e tauala mai i lo latou Amepasa ia Mr Keisuke Senta ina ua siitia le tulaga i masini nei auā galuega o le aoina, faamaumau, faagaioi ma faatusatusa faamatalaga o tagata e ulufale ma malaga ese atu ma le atunuu.
O le isi tulaga lelei o lenei foai o le a maua lelei ai le tulaga i fuainumera aua le fausia o faiga faavae ese mai i lea itu tau Tulafono ae o le puipuiga o e ulufale mai i le atunuu ma o le a fai ma mau aua le fausiaina o faiga faavae.
Ua faailoa ua talafeauga lelei lenei foai ma le alo atu o Samoa i le Fonotaga a ulu o malo o le Taupulega lea o le a tali malo ai Samoa ia Oketopa.
O le galuega lenei a le IMO Samoa e fesoasoani atu i le itulagi lenei o le Pasefika i le taumafaiga e toe faaleleia le tamaoaiga o atunuu talu mai le mafatiaga o le Koviti, ma i le faaauauina la o le saogalemu o tuaoi o atunuu o se mataupu tumua i le taimi nei, ua faaopoopo iai ma le manaomia tele o masini faapea aua lea tulaga.
