Ua tūtu ‘aai loia o loo finauina le tagi a le ta’ita’i o le Itu agai ma le failautusi o le vaega faaupufai e puipuia aiātatau a tagata, e solitulafono ma solifaavae le faai’uga a le Palemene ua talia ai le fautuaga a le komiti o tulaga mamalu ma aloa’ia e faamālōlō lē tumau tiute faafaipule o le Palemene o le sui faipule o le itumalo faapalota o Lepa ma le sui faipule o le Itumalo faapalota o Faleata 3.

O le tuuina atu o folasaga ma finauga faaletulafono a loia mo le itu talosaga na faailoa ai i luma o le faamasinoga sili a le atunuu, o le leai o se avanoa o Tuilaepa ma Lealailepule e tali atu ai i le fautuaga a le komiti e faamālōlō lē tumau i laua seia iai se aso, o se gaioiga ua finau a la loia ua solipala ai o la aiātatau faalefaavae.

O le faai’uga foi e faamālōlō seia iai se aso e aunoa ma le aiaia o se taimi e faamālōlō lē tumau ai e aunoa ma le taofia o le maua o o la totogi, e solitulafono. Pe afai ae faatino se isi faai’uga a le Fofoga Fetalai ma le Palemene e faamālōlō lē tumau ai mo le paeaiga atoa e lē maua lava ni totogi, e solitulafono foi. O le tasi finauga a loia a le itu tagi o le talanoaina o le fautuaga a le komiti o tulaga mamalu ma aloaia e aunoa ma le iai o se leo o le ta’ita’i o le Itu agai, ona o se gaioiga ua noatia ona aiātatau i faiga faaletulafono ua ta’ua o le natural justice.  

I le tali a loia mo le Fofoga Fetalai o le Palemene na faamautu atili ai pea le latou finauga, o le tuuina atu o le faitioga a le Sui Palemia e pei ona faavae ai le su’esu’ega a le komiti o tulaga aloa’ia ma tulaga mamalu o le Palemene e tusa o le faai’uga a le Fofoga Fetalai, sa sosolo i aiaiga o tulafono tumau e faasino i le oia o tulaga mamalu poo privileges o faipule, faapea le aiaiga o tulafono faapalemene e faasino i le faalēmigao i le Palemene le Contempt of Parliament.

O loo teena e loia a le itu tagi lea vaega o le finauga a loia a le itu o loo faasaga iai le lu’i faaletulafono. O le mae’a ona folasia o nei finauga faaletulafono ua taatia atu ai le mataupu mo iloiloga a faamasino e to’atolu sa seei i le su’esu’eina o le mataupu ma e lē o iloa se aso e aumai ai se faai’uga. O le afioga i le Faamasino Sili, le afioga Satiu Simativa Perese, o le sui Faamasino sili afioga Vui Clarence Nelson, ma le tamaitai faamasino le afioga Tafaoimalo Leilani Tuala Warren, sa tauaveina sailiiliga ma su’esu’ega o lea mataupu.