O le vaiaso nei ua faamoemoe e faaulu atu ai i le Faamasinoga Maualuga se finauga faaletulafono ua tapena e le itu faaupufai o loo agaia le malo, i le naunauta’iga e faamanino ai aiaiga o le tulafono faavae e faasino i le tulaga ua pulea ai nei le malo e se vaega to’aitiiti o faipule o le Palemene, e pei ona iai le Palemia ma minisita e to’asefulufā o le Kapeneta.
Ua mafua lea taumafaiga e pei ona faailoa e le ta’ita’i o le Itu Agai le susuga Tuilaepa Lupesoliai Sailele Malielegaoi i le feiloa’iga masani ma le autusitala, ona ua lē o toe avea ma sui auai o le vaega faaupufai o loo tu i le foe o le pulega o le malo le Palemia ma Minisita e to’aono.
Le ta’ita’i o le Itu Agai, susuga Tuilaepa L Sailele Malielegaoi.
O le feiloa’iga a le Palemia ma tusitala i le Aso Tofi ua mavae na faailoa ai se finagalo o le afioga Fiame Naomi Mataafa i le tulaga lea, ma ia faailoa o lana silasila i le tulafono e ‘au aiaiga o iai o le faavae i le pulega faatonu e faaauau ana galuega pe a tula’i mai se gasegase a malo i le lotoifale o le vaega faaupufai o loo pulea le atunuu.
O le a faato’ā manino se tali o lea vala pe afai e mae’a ona iloilo e le faamasinoga le finauga faaletulafono a le itu faaupufai o loo agaia le malo, le pati faaupufai e puipuia aiātatau a tagata.
