Ua i luma nei o le Faamasinoga Maualuga se talosaga mai le vaega faaupufai o loo agaia le malo le patī e puipuia aiā tatau a tagata ua finau ai e faaaogā loa le 10 pasene o loo aiaia i le Vaega 44 o le tulafono faavae e maua ai le nofoa faaopoopo o tinā i le Palemene ma atoa ai nofoa e ono o tama’ita’i i le paea’iga 18 a le Palemene na filifilia mai i le faigāpalota tele faafuase’i ia Aokuso o le tausaga nei.
E to’alima tama’ita’i na manumālō mai i lea faigā filifiliga ae o le faai’uga a le faamasinoga na faia i le tuana’i o le palota tele o le 2021 na faatonuina ai e faato’ā faaaogā pe activate le aiaiga 44 o le faavae i le 10 pasene, pe a mae’a ni faamasinoga o tagi o le palota ma faatali le i’uga o palota laiti pe afai e avanoa ni nofoa o tofi faipule o ni itumalo ona o tagi o le palota.
O le palota tele ia Aokuso e valu tagi o le palota ma o le tasi o ia matāupu ua soloia ai le nofoa sa umia e se tasi o faipule tama’ita’i sa sē’ei i le nofoa o le itumalo faapalota o Safata 1 le afioga Seve Te’i Fuimaono.
O lona uiga ua mana’omia nofoa se lua e atoa ai le ono o nofoa o tama’ita’i i le paea’iga ua iai nei a le Palemene.
O le Aso Gafua o le vaiaso a sau o le a su’esu’e ai le talosaga mai le vaega faaupufai o loo agaia nei le malo.
