E fai si toatele o tagata na potopoto ane e faailoa lo latou lagolagoina o le faia o se suiga i Western Australia poo Ausetalia i Sisifo i le mae’a o le maliu o se talavou sa i lalo o le vaavaaiga a le Setete.
O Cleveland Dodd na maliu i le vaiaso talu ai i le Aso Tofi ina ua faaoomanu’a ia te ia lava i totonu o le nofoaga faasala i le falepuipui i Casuarina.
E na o le 16 tausaga o le talavou ma sa loka i lona sela e pei ona lipotia mo le 23 itula i le aso ma o loo iai lipoti ua ta’ua ai e iai le tagata leoleo poo le guard ua faamalolo lē tumau a o tālia le iuga o le suesuega.
O le finau a le aiga o lē ua maliu lea na malaga ane mai Perth ua ta’ua ai e manaomia suiga ma ua tatau ona tapunia le Unit 18 lea sa loka ai Cleveland.
