Ua foufou le sā o le Komisi Su’esu’e o faiga palota e fa’atino lana galuega o le a sāvalia ai nu’u ma afio’aga o Itumalo palota e 51, mo le sā’ilia o finagalo o le atunu’u i fautuaga e toe teuteu ai le tulafono o faiga palota ma fa’ailoa ai ni faafītauli sa molimauina i le palota tele sa faia ia Aukuso o le tausaga ua mavae.

Ua fa’ailoa e le Komesina o le Ofisa o le Komisi o Faiga Palota ua mae’a ona tōfia e le Kkapeneta sui o le komisi, ma o le tasi o ana galuega o le toe āsia o le Pili o teuteuga o le Tulafono o Faiga Palota o le tausaga e 2025, faapea le pili o teuteuga o le Tulafono Fa’avae o le tausaga 2025 na toe faaui i tua.

Mo le silafia o le paea’iga sefulufitu faapalemene sa talanoaina ai teuteuga o le fa’avae ma le tulafono o faiga palota, lea sa soālaupule ai le aiaiga o le 10 pasene o le nofoa faaopoopo mo tama’ita’i, peita’i na faata’ape lena paea’iga a le palemene ma faia le palota faafuase’i ia Aukuso o le tausaga na te’a nei e lei mae’a ona tagofia ia teuteuga.

O Itumalo palota i le motu o Upolu o le a amata ai le galuega a le Komisi Su’esu’e o faiga palota e pei ona faatulaga mai e le Ofisa o le Komisi o Faiga Palota, e talamalae itumalo faapalota o Vaimauga 1 e oo i Vaimauga 4 i le Aso Lua asau le aso 13 o Oketopa, ona faasolo ai lea i itumalo palota o Faleata, Sagaga, A’ana Alofi, Aiga i le Tai, Falelatai ma Samatau, Lefaga ma Faleaseela, Safata, Siumu, Falealili, Lotofaga, Lepa, Aleipata Itupa i Luga ma Aleipata Itupa i Lalo, o Vaa o Fonoti ma Anoamaa e taualuga iai Upolu i le aso 28 o le masina nei o Oketopa.

O Itumalo palota e 20 i le motu o Savai‘i o le a aga‘i i ai le Komisi Su’esu’e o Faiga Palota e fa‘aauau ai lana galuega i le masina o Novema se‘ia o‘o ina fa‘asopolia atoa le atunu‘u.

E toʻasefulu lua sui o le komisi suesue e ta’ita’ifono ai le afioga Tuigamala Vaisilika Vaaiga Tuigamala, ae faufautua le Loia Sili a le malo, le afioga Mauga Precious Chang, ma le Komesina o le Ofisa o le Komisi o Faigapalota, le afioga Toleafoa Tuiafelolo Alexander John Stanley.