E lua auaunaga a le malo ua filifilia o la faauluuluga poo Ofisa Sili e pei ona faamaonia e le Kapeneta le faauluuluga fou o le Matāgaluega o Tiute, faapea ma le faauluuluga fou o le Pulega o le Suāvai.

O le afioga Leota Namulauulu Maualaivao o le pule fou o le Pulega o le Suāvai ma o ia le tama’ita’i lona lua ua tauaveina lea tofiga i totonu o lea auaunaga a le malo o loo iai le vaaia o le suāvai taumafa ma isi tautua e fesoota’i i tiute tauave o lea pulega.

Ua suitulaga le afioga Leota Namulauulu Maualaivao i lē sa avea ma faauluuluga o le Pulega o le Suāvai na faamavae ona o fuafuaga tau i lona aiga, le afioga Fuimaono Dominic Schwalger.

O le Matāgaluega o Tiute ua filifilia e avea ma ona Ofisa Sili fou o le pulega le afioga Mulipola Lemalu Teofilo ua suitulaga i le afioga Fonoti Talaitupu Li’a Taefu sa tauaveina lea tofiga a o tuufaatasi le vaega o tupe maua ma le tiute peita’i ua vaelua ma ua ese le Matāgaluega o Tupe Maua ese le Matāgaluega o Tiute.

O se tasi o filifiliga ua faailoa e le Palemia i le fono masani ma le autusitala i lenei vaiaso, o le toe tofia lea o le tama’ita’i le afioga Tuitoga Christina Angela Te’o Faitele, na ulua’i filifilia e le malo i le tausaga e 2023 e avea ma faauluuluga o le Ofisa o Tausi Mavaega.

E ta’i tolu tausaga le umi o taimi galue o faauluuluga uma o auaunaga a le malo i aiaiga faaletulafono o galuega faakonekarate.