E lē toe po se lilo i le toatele o alo ma fanau o le atunuu ua maua avanoa mo kalapu e taaalo ai mo se vaitaimi, ona o le mata’ina o a latou taumafaiga.  

Ma o se fiafiaga ma se mitamitaga le mafai ona filifilia le alii talavou ia Pesamino Ah Tong-Sefo mo se kalapu i Roma.

O lenei atalii, e taalo mo le Under 17 a le Mangere United FC ma sa filifilia ma amanaia e nisi o tagata iloga i le taaloga soka a o iai Pesamino i le polokalame a le CM Maestro Services i Takanini a o aoga ai i le Kolisi Maualuga o De La Salle.  

I faamatalaga i luga o upega tafailagi poo le itulau a le Mangere United AFC i le vaiaso lenei na faaalia ai  lagona o le fiafia i taumafaiga a Pesamino Ah Tong-Sefo. 

Na faailo foi e le faiaoga o le ‘au Under 17 a Mangere le mata’ina o le taalo a lenei alo o le atunuu, na ia ta’ua o se alii na taalo lakapi peitai na maitauina le lelei o lona taalo i le taaloga soka, o lea lava na filifilia e tausinio i taaloga faavaomalo i Amerika, a o iai i le polokalame a le CM Maestro Services.  

Ta’ua foi e le alii faiaoga mai taaloga uma o le tausaga na se’i mavae atu nei na tausinio ai Pesamino, e 28 lelei ana sikoa na mafai ona fai e le atalii.  

Ina ua fesiligia e sui o le kalapu le atalii mo sona manatu e tusa ai ma lenei faamanuiaga, ae na faapea lenei alii, o se faamanuiaga lē aumaua ma ua ia sauni foi e tapena mo lenei konekarate.

Ma o lona fautuaga i talavou uma, afai ae mafai e ia ona maua nei faamanuiaga, e mafai foi e soo se talavou ona ausia matati’a faapenei, pe afai ae galue ma le faamaoni e atiae le taleni.  

E 3 tausaga le umi o le Konekarate o le a auai atu ai Pesamino Ah Tong-Sefo i Roma, ma o le a taalo ai mo le Rome City FC i lana ‘au Under 19.

O Pesamino Ah Tong-Sefo e mai alalafaga o Luatuanuu, Tufiopa, Lefaga ma Saasaai Savaii.

O le tausaga fou i le masina o Ianuari o le a tuuvaa atu ai Pesamino mo lana kalapu i Roma.