Ua filifilia e le pulega o le kamupani vaalele a Ausetalia o le Qantas, se tasi o tamafanau a le atunuu ua leva tausaga o galue mo le Polenisia ma le Air New Zealand e na te pulea galuega uma tau uta ma pasese a le kamupani i le malaevaalele faavaomalo i Faleolo.
O le susuga Papalii Francis Fepulea’i na filifilia i lea tulaga o loo galue i Niu Sila i se kamupani e ave ai uta ma faamomoli i isi atunuu.
I se talanoaga ma le susuga Papalii na ia faailoa ai ni suiga i aso o malaga a le Qantas i ana malaga e lua i le vaiaso, lea ua amata i le vaiaso nei o Aso Faraile ma Aso Sa e taunuu ai i Samoa, ma o aso foi ia e malaga ese ai mo lana malaga i Sini faapea ma Brisbane.
O suiga nei e pei ona faaalia e le alii pule o galuega a le Qantas i le malaevaalele faavaomalo i Faleolo, o le a faaauau seia aulia le masina o Oketopa ona toe iai lea o se isi suiga, ma o le a iloa ai foi i lena taimi pe toe faaopoopo nisi malaga i le vaiaso.
O loo iai fuafuaga a lea kamupani vaalele e tatala sona ofisa tutotonu i le taulaga i Apia i se taimi o le a talafeagai ai e pei o isi kamupani vaalele e pei o le Fiji Airways.
O sea tulaga o le a faigofie ai mo tagata malaga ia latou tapenaga mo ni malaga i atunuu i fafo.
