O le fonotaga lona lima lenei o loo auai ai Samoa i Colombo i Sri Lanka o loo talanoaina ai nisi o mataupu tau i le siosiomaga e Minisita o loo tauaveina tofiga o nei vaega faapea ai ma Pulega o loo galulue i vaega tau i le siosiomaga.

Ua faailoa e le ofisa o polokalame tau i le siosiomaga a le Pasefika le Secretariat of the Pacific Environment Programme (S.P.R.E.P.) ua filifilia ai le sui mai le Matagaluega o le Siosiomaga, Moira Faletutulu e avea ma Sui Taitaifono o lenei fonotaga.

O lenei fonotaga o se alafua lea mo Malo, o faalapotopotoga tuma’oti a Malo aemaise o ana paaga e talanoaina ma faasoa ai i nisi o mataupu tau le siosiomaga e ao ona ave iai le faamuamua i totonu lava o le atu Asia ma le Pasefika.

O le a talanoaina ai ma mataupu e ogatasi ma vaega o le a agai iai se tasi o fonotaga i le siosiomaga i le tausaga fou ma faatino ai iloiloga o vaega ua siitia ai le tulaga o faatinoga o matafaioi o loo autasi ai sui o le fonotaga lenei auā le manuia o siosiomaga ma le saogalemu o ona tagata mai suiga o le tau o loo aafia ai.

O lenei foi fonotaga o le a silasila ai i nisi o faafitauli o loo tele ina lofia ai atunuu o le Pasefika ma Asia ina ia mafai ona maua ai se fesoasoani e ala i manatu faaalia e faufau ai se gaioiga e tali atu ai i nei faafitauli aemaise o maliega e faatino ai nei fesoasoani.

O loo laualuga nei mataupu i taiala ma atinae faaauau ua mae’a fausia i nisi o fonotaga ua mavae ina ia gafataulimaina pea e atunuu ona tutū faatasi e tali atu i faafitauli o loo aafia ai ona siosiomaga.

E valu atunuu o le Pasefika o loo iai i lenei fonotaga ma o loo faagasolo mo le tolu aso.