E na o le 18 tausaga o le sui tauva o le Labour ua faamaonia o le a finauina le nofoa o Waitaki i le palota tele a sau nei.
O Ethan Reille afai ae manuia ana taumafaiga i le palota ia Oketopa o lona uiga o ia o le sui faipule aupito i laititi i le talafaasolopito o Niu Sila.
I tala a le Herald o loo molimau ai le alii talavou i lona loto e naunau ia faaauau ona auauna mo le komiuniti ma o se mitamitaga foi ia te ia le fai ai ma sui o ona tagata Waitaki.
O le palota faatoa uma atu i le 2020 na tauva ai le 17 tausaga, William Wood i lalo o le fu’a a le National mo Palmerston North, peitai e lei manuia.
O le sui faipule aupito i laititi o loo iai nei i faamaumauga a le Palemene, o James Stuart-Wortley lea sa na o le 20 tausaga ma le 7 masina le matua i le taimi na filifilia ai i le 170 tausaga talu ai.
O Waitaki o loo tauavea ai e Jacqui Dean o le National lea e le toe tauva, ma o Miles Anderson o ia o se faifaatoaga le sui o le National o le a tamomoe faatasi ma le alii talavou ia Ethan.
