I le 40 o taaloga faitaulia poo test a le aulakapi a le atunuu le Manu Samoa sa filifilia iai le susuga Mahonri Schwalger ua umia le suafa matai o Mase mai le afioaga o Saleaula, o se tasi lea o tamafanau a le atunuu i le Manu Samoa e lē gata o taaloga faavaomalo ae o taamilosaga o le Ipu o le Lalolagi sa matuā iloga ai lona sao mo le atunuu.

Ua iu le sailiga a le Pulega o le Lakapi Samoa i se faiaoga ulu o le tatou aulakapi tele ma ua filifilia nei iai le susuga Mase Mahonri Schwalger.

Ua ia faaauau le galuega sa filifilia iai se tasi o tamalii o se tamafanau a le atunuu sa tautua foi i le Manu Samoa le afioga Vaovasamanaia Seilala Maposua, e fā tausaga sa avea ai ma faiaoga ulu talu mai le tausaga e 2021.

E fā foi tausaga o le a galue ai Mase Mahonri Schwalger seia aulia le Ipu o le Lalolagi i le tausaga e 2027.

Sa avea o ia ma faiaoga o le Manu Samoa laiti poo le Junior Manu Samoa i le tausaga e 2017, ae sa avea foi ma faiaoga lagolago i aulakapi o le Samoa A ma le Manuma faapea ma le tatou ‘au tele o le Manu Samoa.

Sa kapeteni e Mase Mahonri Schwalger le Manu Samoa i le Ipu o le Lalolagi o le tausaga e 2011.