Faipule Faleata Nu. 4 - Ale Vena Ale

Fia tuto’atasi le Faipule o Faleata 4

Ua faaleo i le Palemene le finagalo o le Faipule o Faleata 4 le tofa i le Igoamatua Ale Vena Ale ua tatau ona toe teuteu le tulafono o faigapalota ma aveese teuteuga na pasia a o lumanai le palota tele ia Aperila o le tausaga na te’a nei.

O le teuteuga lea ua loka ma tu’imau ai tofi faipule o itumalo i pati faaupufai e lē mafai ona toe suia se vaega faaupufai e lagolago iai pe a manumalo i se faigapalota mo nofoa o le Palemene, ma lē mafai ai ona tuto’atasi pe a fia alu ese mai ma se pati. Ua faaalia e Ale i lana saunoaga faalaua’itele i le Tala autu o le Tupe, e faailoga tagata lea teuteuga. 

O le feiloaiga a le ta’ita’i o le vaega faaupufai e puipuia aiātatau a tagata ma nisi o tusitala na faaalia ai e le susuga Tuilaepa L Sailele Malielegaoi, e tāua le laga e se tasi o faipule o lana pati o le mataupu, ae ua laga ai ma se fesili pe o le a le tāua na fausia ai lea teuteuga.  

Sa tāpā se finagalo o le faipule o Faleata 4 e tusa o le finagalo o le ta’ita’i o le latou pati faaupufai, ae na faailoa mai e le tofa Ale Vena Ale, e iai se taimi ona talanoa mai lea. 

O le a talia se finagalo o le Minisita o le Ofisa o le Komisi o Faigapalota le afioga Faualo Harry Jeffrey Schuster i le fautuaga a le faipule o Faleata 4, i le taimi e tali ai le Malo i saunoaga faalaua’itele o le tala autu o le Tupe. 

Scroll to Top

Keep uptodate with Radio Samoa activity & promotion

* indicates required