O le Aso Tofi o le vaiaso nei ua toe tolo iai le isi valaauga o moliaga o faiga faaālatua o le Minisita o Faamasinoga, ona ua mana’omia e le faamasino ni faamaumauga a loia a le itu tagi e faailoa atu ai po ua iai se finagalo o le Loia Sili a le malo, i le tuuina atu o moliaga e su’esu’e e se loia tuma’oti, le private prosecution, ae lē o loia a le malo o loo finauina moliaga solitulafono.
O aiaiga faaletulafono e tāpā ai se faatagana a le Loia Sili i le faia o se faamasinoga i aiaiga o le private prosecution, ma o lea foi aiaiga faaletulafono e faaauau ai poo le taofia o le su’esu’eina o ni moliaga solitulafono.
E lima moliaga o le Minisita o Faamasinoga o loo tuuina atu i se tagi a se matai mai le afio’aga o Vaiusu i le itumalo faapalota o Faleata 2, le tofa Ulugia Mata’u Matafeo.
E le’i tuuina atu se tali a le Minisita o le sui Faipule o Aana Alofi Numera 1, le tofa Fesola’i Apulu Tusiupu Tuigamala.
