O loo taofia nei i le potu o gasegase tigaina i le falemai o Tupua Tamasese Meaole i Motootua se tina talavou mo togafitiga ona o manu’a mai se laaumalosi poo se fana.
Ua faailoa e le sui komesina o leoleo le susuga Papalii Monalisa Tia’i Keti i nisi o auala o faasalalauga, e toalua ni alii sa aveina i se taavale laititi poo se taxi lea tina i le falemai, ma o loo iai le talitonuga o leoleo e tatau ona maua ia i laua ia nisi faamatalaga o le mea na tupu.
Na pau faamatalaga ua taulimaina e leoleo o manu’aga o le tina e mafua i lona faaaogā o le laau malosi ia te ia lava poo self-inflicted wounds.
Ua faailoa foi e le sui komesina o se mataupu e aafia ai le lotoifale faaleulugalii o loo masalomia i le mafuaaga o lea faalavelave peitai e maua le ata manino atoa o le mea na tupu ma le mafuaaga pe a mae’a suesuega ua faagasolo a leoleo.
O le ao poo le ulu o le tina ua aafia i le pulu o le laaumalosi ma ua lipotia foi ua 21 tausaga o lona matua ma o se tausi soifua.
