Ua fia feiloa’i i tusitala le matāgaluega o leoleo ma le ofisa o le tiute, se’i fofola mai se faamatalaga auiliili i le pusamoa na nanā mai ai le 1.4 kilokalama o le pauta faasāina o le ‘aisa lea na maua i le uafu i Matautu i Apia i le Aso Toona’i na te’a nei.
Ua sau i fafo se lipoti ua faailoa ai o se alii e galue o se avetaavale a se minisita o le Kapeneta na aga’i i le uafu e aumai le pusamoa na maua iai ma nakoti, peita’i o le a faato’ā manino tonu lea tulaga pe a maua se feiloa’iga i sui o le matāgaluega o leoleo ma le ofisa o le tiute i le ogatotonu o lenei vaiaso.
O se tasi lea o vaega tele o le ‘aisa na maua i le Aso Toona’i na te’a nei e pei foi o se isi vaega o nakoti e tusa ma le 4 kilokalama le mamafa o le ‘aisa na maua foi i se pusaoloa na aumai mai Amerika.
O le pusamoa sa nanā mai ai le ‘aisa na aumai mai Amerika Samoa.
